ക്ഷേമനിധി ബോര്‍ഡുകള്‍ സംയോജിപ്പിക്കും; പതിനാറില്‍നിന്ന് 11 ആയി ചുരുക്കും

തിരുവനന്തപുരം > തൊഴില് വകുപ്പിനു കീഴില് പ്രവര്ത്തിച്ചു വരുന്ന 16 ക്ഷേമനിധി ബോര്ഡുകളുടെ എണ്ണം 11 ആയി കുറയ്ക്കാന് ഇന്നു ചേര്ന്ന മന്ത്രിസഭായോഗം തീരുമാനിച്ചതായി മുഖ്യമന്ത്രി പിണറായി വിജയന് അറിയിച്ചു. കോവിഡ് അവലോകന യോഗത്തിനു ശേഷം നടത്തിയ വാര്ത്താ സമ്മേളനത്തിലാണ് അദ്ദേഹം ഇക്കാര്യം അറിയിച്ചത്.

കേരള അബ്കാരി തൊഴിലാളി ക്ഷേമനിധി ബോര്ഡ്, കേരള കള്ളു വ്യവസായ തൊഴിലാളി ക്ഷേമനിധി ബോര്ഡുമായും കേരള ആഭരണ തൊഴിലാളി ക്ഷേമനിധി ബോര്ഡ് കേരള ഷോപ്പ്സ് ആന്ഡ് കമേഴ്സ്യല് എസ്റ്റാബ്ലിഷ്മെന്റ് തൊഴിലാളി ക്ഷേമനിധി ബോര്ഡുമായി സംയോജിപ്പിക്കും.

കേരള ചെറുകിട തോട്ടം തൊഴിലാളി ക്ഷേമനിധി ബോര്ഡും കേരള ഈറ്റ-കാട്ടുവള്ളി-തഴ തൊഴിലാളി ക്ഷേമനിധി ബോര്ഡും കേരള ലേബര് വെല്ഫയര് ബോര്ഡുമായി ചേര്ക്കും. കേരള ബീഡി ആന്ഡ് സിഗാര് തൊഴിലാളി ക്ഷേമനിധി ബോര്ഡ്, കേരള കൈത്തറി തൊഴിലാളി ക്ഷേമനിധി ബോര്ഡുമായാണ് സംയോജിപ്പിക്കുന്നത്.

ഉയര്ന്ന ഭരണച്ചെലവു കാരണം മിക്ക ക്ഷേമനിധി ബോര്ഡുകളും സാമ്പത്തിക പ്രതിസന്ധിയിലാണ്. പല ബോര്ഡുകളുടെയും നിലനില്പ്പ് തന്നെ പ്രയാസത്തിലാണ്. ബോര്ഡുകളില് അംഗങ്ങളായ തൊഴിലാളികളുടെ ക്ഷേമം ഉറപ്പുവരുത്തിക്കൊണ്ട് എണ്ണം കുറയ്ക്കേണ്ടത് അനിവാര്യമായിരിക്കുകയാണ്.

ഈ പ്രശ്നം പഠിക്കാന് ലേബര് കമ്മീഷണര് അധ്യക്ഷനായ, തൊഴിലാളി സംഘടനാ പ്രതിനിധികള് ഉള്പ്പെടുന്ന സബ് കമ്മറ്റികള് രൂപവത്കരിച്ചിരുന്നു. ഈ കമ്മറ്റികളുടെ ശുപാര്ശ പരിഗണിച്ചാണ് 16 ബോര്ഡുകള് 11 ആയി ചുരുക്കാന് തീരുമാനിച്ചത്. ഇത് പ്രാവര്ത്തികമാക്കാന് നിയമനിര്മാണം നടത്താനും തീരുമാനിച്ചതായി മുഖ്യമന്ത്രി പറഞ്ഞു.