ഡല്‍ഹി ടെസ്റ്റുകളില്‍ മറിമായം; ആന്റിജൻ ടെസ്റ്റില്‍ നെഗറ്റീവായവരിൽ 15 ശതമാനവും രോ​ഗികള്‍

ന്യൂഡൽഹി > ഡൽഹിയിൽ കോവിഡ് ബാധിതരുടെഎണ്ണത്തിൽ പെട്ടെന്നുണ്ടായ കുറവ് ആന്റിജൻ ടെസ്റ്റുകൾ നൽകുന്ന തെറ്റായ നെഗറ്റീവ് ഫലംമൂലമെന്ന്. ജൂൺ 18 മുതൽ 21 വരെ ഡൽഹിയിൽ ആന്റിജൻ ടെസ്റ്റിൽ നെഗറ്റീവ് ഫലം ലഭിച്ച സാമ്പിളുകളിൽ 15 ശതമാനത്തോളം ആർടി–- പിസിആർ ടെസ്റ്റിൽ പോസിറ്റീവ് ഫലം കാട്ടി.

നിലവിൽ ഡൽഹിയിലെ കോവിഡ് പരിശോധനകളിൽ മൂന്നിൽ രണ്ടും ആന്റിജൻ പരിശോധനകളാണ്. ആർടി–- പിസിആർ പരിശോധന ഗണ്യമായി കുറഞ്ഞു. ഞായറാഴ്ച 17,533 പരിശോധന നടത്തി. ഇതിൽ 5032 ആർടി–- പിസിആർ പരിശോധനയും 12,501 എണ്ണം ആന്റിജൻ പരിശോധനയുമാണ്.

ആന്റിജൻ പരിശോധന വർധിച്ചതോടെയാണ് ഡൽഹിയിൽ ദിവസേനയുള്ള രോ​ഗികളുടെ എണ്ണം 1500ൽ താഴെയായത്. ഡല്ഹിയില് ഒറ്റദിവസത്തെ രോ​ഗികളുടെ എണ്ണം ഒരു ഘട്ടത്തിൽ 4000 വരെ എത്തി. ജൂൺ 18 മുതൽ ജൂലൈ 21 വരെ ആന്റിജൻ പരിശോധന നെഗറ്റീവ് ഫലം കാട്ടുകയും എന്നാൽ രോഗലക്ഷണം പ്രകടമാകുകയും ചെയ്ത 2300 പേരെ ആർടി–- പിസിആർ പരിശോധനയ്ക്ക് വിധേയമാക്കിയപ്പോൾ 345 പേർക്ക് പോസിറ്റീവ് ഫലം ലഭിച്ചു. 60 ശതമാനത്തിലേറെ രോ​ഗികളിലും ലക്ഷണം പ്രകടമാകാത്തതിനാൽ ആന്റിജൻ പരിശോധനയിൽ നെഗറ്റീവ് ഫലം ലഭിച്ചവരിൽ നല്ലൊരു പങ്ക് പോസിറ്റീവാകാൻ സാധ്യതയുണ്ടെന്നാണ് വിലയിരുത്തല്.

കോവിഡ് പോസിറ്റീവായശേഷം 10 ദിവസം രോഗലക്ഷണമില്ലെങ്കില് രോഗമുക്തരായി കണക്കാക്കാമെന്ന ഡൽഹി സർക്കാരിന്റെ വ്യവസ്ഥയും വിമർശിക്കപ്പെടുന്നു.