തിരു.എയർപോർട്ട് സ്വകാര്യവത്കരണം: വൻപ്രതിഷേധം ഉയരണമെന്ന് എൽഡിഎഫ് കൺവീനർ

തിരുവനന്തപുരം > കേരളത്തിന്റെ എതിർപ്പും സംസ്ഥാന സർക്കാർ മുന്നോട്ടുവച്ച മാതൃകയും തള്ളി തിരുവനന്തപുരം രാജ്യാന്തര വിമാനത്താവളം അദാനി ഗ്രൂപ്പിന് നൽകിയ കേന്ദ്ര സർക്കാർ തീരുമാനത്തിനെതിരെ വൻ പ്രതിഷേധം ഉയർത്തണമെന്ന് എൽഡിഎഫ് കൺവീനർ എ വിജയരാഘവൻ ആവശ്യപ്പെട്ടു. കേരളത്തിൽ പൊതുമേഖലയിൽ ഇനി ബാക്കിയുള്ള എല്ലാ വിമാനത്താവളങ്ങളും തുറമുഖങ്ങളും പൊതുമേഖലാ സ്ഥാപനങ്ങളും സ്വകാര്യ മേഖലയ്ക്ക് വിൽക്കുമെന്ന് തീർച്ചയാണ്. സംസ്ഥാന നിയമസഭ ഏകകണ്ഠമായി സ്വകാര്യവൽക്കരണത്തെ എതിർത്തു. മുഖ്യമന്ത്രിയുൾപ്പെടെ പ്രധാനമന്ത്രിയെ കണ്ട് തീരുമാനം പിൻവലിക്കണമെന്ന് ആവശ്യപ്പെട്ടിരുന്നു. സംസ്ഥാന സർക്കാർ വിമാനത്താവള നടത്തിപ്പിന് ബദൽ മാതൃകയും മുന്നോട്ടുവച്ചു. എന്നാൽ കേരളത്തിന്റെ വികാരം മനസ്സിലാക്കാൻ കേന്ദ്ര സർക്കാർ തയ്യാറായിട്ടില്ല. വിമാനത്താവള വിൽപ്പനയെ ന്യായീകരിച്ച് കേന്ദ്രമന്ത്രി വി മുരളീധരനും കോൺഗ്രസ് എംപി ശശി തരൂരും രംഗത്ത് വന്നത് അപഹാസ്യമാണെന്നും വിജയരാഘവൻ പറഞ്ഞു.

രാജ്യത്ത് സംസ്ഥാന സർക്കാർ നേതൃത്വത്തിൽ വിമാനത്താവളം ഏറ്റവും നല്ല നിലയിൽ നടത്തുന്നത് കേരളത്തിലാണ്. കേന്ദ്ര സർക്കാർ പൊതുസ്വത്ത് വിൽക്കുമ്പോൾ കേരളം അത് സംരക്ഷിച്ച് കൂടുതൽ വികസനം നടപ്പാക്കുകയാണ്. ഈ മാതൃകയാണ് തിരുവനന്തപുരത്തിന്റെ കാര്യത്തിലും സർക്കാർ സമർപ്പിച്ചത്. കേന്ദ്ര സർക്കാരിന്റെ ഈ വെല്ലുവിളിയ്ക്കെതിരെ ശക്തമായ പ്രതിരോധം തീർക്കാൻ തയ്യാറാകണമെന്ന് എ വിജയരാഘവൻ പ്രസ്താവനയിൽ പറഞ്ഞു.