സിബിഐ അന്വേഷണം: ലൈഫ്‌ മിഷൻ നൽകിയ ഹർജി ഹൈക്കോടതി 8ന്‌ വീണ്ടും പരിഗണിക്കും

കൊച്ചി> സിബിഐ കേസ് രാഷ്ട്രീയ പ്രേരിതമാണെന്ന് കാട്ടി ലൈഫ് മിഷൻ നൽകിയ ഹർജി ഒക്ടോബർ എട്ടിന് ഹൈക്കോടതി വീണ്ടും പരിഗണിക്കും. ഹർജിയിൽ അനിൽ അക്കര എംഎൽഎക്കും സിബിഐക്കും നോട്ടീസ് അയയ്ക്കാന് ഉത്തരവായി.സിബിഐ അന്വേഷണം കോടതി സ്റ്റേ ചെയ്തില്ല.

വടക്കാഞ്ചേരിയിൽ ദുബായ് റെഡ് ക്രസൻറ് നിർമ്മിക്കുന്ന ഭവനപദ്ധതിക്കെതിരെ സിബിഐ കോടതിയിൽ സമർപ്പിച്ച പ്രഥമ വിവര റിപ്പോർട്ട് റദ്ദാക്കണമെന്നാവശ്യപ്പെട്ടാണ് ലൈഫ് മിഷൻ ചീഫ് എക്സിക്യൂട്ടീവ് ഓഫീസർ യു വി ജോസ് ഹർജി നൽകിയത്.

വീടില്ലാത്തവർക്ക് പാർപ്പിടം നൽകാനുള്ള ലൈഫ് പദ്ധതിയുടെ നടത്തിപ്പിന് യുണിടാക്, സാൻവെഞ്ചേഴ്സ് എന്നീ കമ്പനികൾ യുഎഇയിലെ റെഡ്ക്രസന്റിൽനിന്ന് പണം കൈപ്പറ്റിയതിൽ അപാകതയില്ല. വിദേശ ഫണ്ട് വാങ്ങുന്നതിന് നിയമപ്രകാരം വിലക്കുള്ളവയുടെ പട്ടികയിൽ വരുന്നതല്ല ഈ രണ്ട് കമ്പനികളും.

കേന്ദ്ര സർക്കാർ പുറപ്പെടുവിച്ച വിജ്ഞാപനത്തിലും ഇത്തരം കമ്പനികൾക്ക് വിലക്കില്ല. കമ്പനികൾ ഏറ്റെടുക്കുന്ന ജോലിക്ക് പണം സ്വീകരിക്കാം. ഇതിന് നിയമത്തിൽ വ്യവസ്ഥയുണ്ട്. വിദേശ ഫണ്ട് വാങ്ങുന്നതിന് വിലക്കേർപ്പെടുത്തിയിട്ടുള്ളവരിൽ സർക്കാരോ സർക്കാർ ഏജൻസികളോ പെടില്ല.

2020 ജനുവരി 30ന് കേന്ദ്ര സർക്കാർ പുറപ്പെടുവിച്ച വിജ്ഞാപനത്തിൽ സിഎജി ഓഡിറ്റുള്ള സർക്കാർ ഏജൻസികൾക്ക് വിദേശ ഫണ്ട് വാങ്ങുന്നതിൽ വിലക്കില്ലെന്ന് വ്യക്തമാക്കിയിട്ടുണ്ട്. അതിനാൽ, ലൈഫ് പദ്ധതിക്ക് കേന്ദ്ര നിയമപ്രകാരം വിലക്കില്ല. അനിൽ അക്കര എംഎൽഎയുടെ പരാതിയിൽ കേസെടുത്ത സിബിഐയുടെ നടപടി നിയമാനുസൃതമല്ല.പല കേസുകളും അന്വേഷിക്കാൻ വിസമ്മതം പ്രകടിപ്പിക്കുന്ന സിബിഐ ഈ കേസ് അന്വേഷണത്തിന് തിടുക്കം കാട്ടുന്നതിനുപിന്നിൽ രാഷ്ട്രീയ ലക്ഷ്യമുണ്ട്.

ഫ്ലാറ്റ് നിർമാണത്തിന് ലൈഫ് മിഷനും റെഡ്ക്രസന്റും തമ്മിലാണ് കരാർ. പദ്ധതിയുടെ നിർമാണം ഏറ്റെടുക്കുന്ന കരാറുകാരുമായി സർക്കാരിനോ ലൈഫ് മിഷനോ നേരിട്ട് ബന്ധമുണ്ടാകില്ലെന്ന് കരാറിൽ വ്യക്തമാക്കിയിട്ടുണ്ടെന്നും ഹർജിയിൽ ലൈഫ് മിഷൻ വ്യക്തമാക്കിയിട്ടുണ്ട്.