പ്രത്യേക അന്വേഷണസംഘം പെൺകുട്ടിയുടെ വീട്ടുകാരുടെ മൊഴിയെടുക്കുന്നു; കുടുംബാംഗങ്ങളെ സന്ദർശിച്ച ശേഷമേ മടങ്ങൂവെന്ന്‌ സിപിഐ എം നേതാക്കൾ

ലഖ്നൗ > ഹാഥ്രാസിൽ ബലാത്സംഗത്തിന് ഇരയായി കൊലചെയ്യപ്പെട്ട പെൺകുട്ടിയുടെ വീട്ടിൽ പ്രത്യേക അന്വേഷണസംഘം കുടുംബാംഗങ്ങളുടെ മൊഴി എടുക്കുന്നു. നാല് മണിക്കൂറായി പെൺകുട്ടിയുടെ വീട്ടുകാരിൽനിന്ന് മൊഴി എടുത്തുകൊണ്ടിരിക്കുകയാണ് സംഘം. ഇന്നലെ മുഖ്യമന്ത്രി യോഗി സിബിഐയ്ക്ക് കൈമാറിയെന്ന് പ്രഖ്യാപിച്ചെങ്കിലും രാവിലെയോടെ അന്വേഷണസംഘം പെൺകുട്ടിയുടെ വീട്ടിൽ എത്തുകയായിരുന്നു.

പെൺകുട്ടിയുടെ വീട്ടുകാരെ കോവിഡ് ടെസ്റ്റിന് വിധേയമാക്കണമെന്ന് സംഘം ആവശ്യപ്പെട്ടതിനനുസരിച്ച് മെഡിക്കൽ സംഘം എത്തിയിട്ടുണ്ട്. ബന്ധുക്കളെ കാണാനെത്തിയ സിപിഐ എം, സിഐടിയു, മഹിളാ അസോസിയേഷൻ നേതാക്കൾക്ക് ഇതുവരെ ബന്ധുക്കളെ കാണാനോ സംസാരിക്കാനോ ഇതുവരെ കഴിഞ്ഞിട്ടില്ല. കുടുംബാംഗങ്ങളെ കണ്ടശേഷം മാത്രമേ ഹാഥ്രാസിൽ നിന്ന് മടങ്ങൂ എന്ന് സിപിഐ എം കേന്ദ്രകമ്മിറ്റി അംഗവും അഖിലേന്ത്യാ കിസാൻ സഭ ദേശീയ ജോയിൻ്റ് സെക്രട്ടറിയുമായ വിജൂ കൃഷ്ണൻ പറഞ്ഞു. പാർടി കേന്ദ്രകമ്മിറ്റി അംഗവും സിഐടിയു ദേശീയ സെക്രട്ടറിയുമായ എ ആർ സിന്ധു, അഖിലേന്ത്യാ കർഷക തൊഴിലാളി യൂണിയൻ ജനറൽ സെക്രട്ടറി ബി വെങ്കട്, കർഷക തൊഴിലാളി യൂണിയൻ ദേശീയ ജോയിൻ്റ് സെക്രട്ടറി വിക്രം സിങ്ങ്, അഖിലേന്ത്യാ ജനാധിപത്യ മഹിളാ അസോസിയേഷൻ ട്രഷറർ പുണ്യവതി, ജോയിൻ്റ് സെക്രട്ടറി ആശാ ശർമ എന്നിവരാണ് പെൺകുട്ടിയുടെ കുടുംബാംഗങ്ങളെ സന്ദർശിക്കുന്നത്.

(ഹാഥ്രാസിൽനിന്ന് ദേശാഭിമാനി ഡൽഹി ബ്യൂറോ ചീഫ് സാജൻ എവുജിൻ)