അലാവുദ്ദീന്റെ അത്ഭുതവിളക്കിന്റെ പേരിൽ തട്ടിപ്പ്‌: ഡോക്ടറിൽ നിന്നു 33 ലക്ഷം തട്ടി

ലഖ്നൗ > അലാവുദ്ദീന്റെ അത്ഭുതവിളക്കെന്നു പറഞ്ഞ് ഉത്തർപ്രദേശിൽ ഡോക്ടറുടെ കൈയിൽനിന്ന് 33 ലക്ഷം തട്ടി. രണ്ടുപേരെ അറസ്റ്റ് ചെയ്തു. മീററ്റിലാണ് സംഭവം.

തന്റെയടുത്ത് ചികിത്സയ്ക്കെത്തിയ​ സ്​ത്രീയുടെ കൂടെ വന്നവരാണ് തട്ടിപ്പ് നടത്തിയതെന്ന് ഡോക്ടർ പൊലീസിനു നൽകിയ പരാതിയിൽ പറയുന്നു. സ്ത്രീയുടെ വീട്ടിൽ സ്ഥിരമായി എത്തുന്ന ഒരു ബാബയെക്കുറിച്ച്​ തന്നോട്​ പറയുകയും അദ്ദേഹത്തിന്റെ മാന്ത്രികവിദ്യകളെക്കുറിച്ച്​ വിശ്വസിപ്പിക്കുകയും ചെയ്താണ് തട്ടിപ്പ്.

അലാവുദ്ദീന്റെ വിളക്കാണെന്നും, അത് കൈവശംവച്ചാൽ ജിന്ന്​ പ്രത്യക്ഷപ്പെടുമെന്നും സമ്പത്തും ആരോഗ്യവും നല്ല ഭാവിയും കൈവരു​മെന്നും അവർ വിശ്വസിപ്പിച്ചു. ഒന്നരക്കോടി വിലപറഞ്ഞ വിളക്ക് 33 ലക്ഷത്തിനാണ് വാങ്ങിയത്.

ബാബയെ കാണാൻ ചെന്നപ്പോൾ അലാവുദ്ദീനായി വേഷം ധരിച്ചൊരാൾ ത​ന്റെ മുമ്പിൽ പ്രത്യക്ഷപ്പെട്ടിരുന്നു. പണം തട്ടിയവരിൽ ഒരാൾ വേഷംകെട്ടി എത്തിയതാണെന്ന് പിന്നീടാണ്​ മനസ്സിലായതെന്നും -ഡോക്ടർ പറഞ്ഞു.