മതനിരപേക്ഷതയ്‌ക്കായുള്ള പോരാട്ടത്തിൽ എസ്‌എഫ്‌ഐയുടെ പങ്ക്‌ വലുത്‌: മുഖ്യമന്ത്രി

തിരുവനന്തപുരം > രാജ്യത്ത് മതനിരപേക്ഷതയ്ക്കായുള്ള പോരാട്ടത്തിൽ എസ്എഫ്ഐയുടെ പങ്ക് നിസ്തുലമാണെന്ന് മുഖ്യമന്ത്രി പിണറായി വിജയൻ പറഞ്ഞു. പുത്തരിക്കണ്ടം നായനാർ പാർക്കിൽ എസ്എഫ്ഐ അമ്പതാം വാർഷികം ഉദ്ഘാടനംചെയ്ത് സംസാരിക്കുകയായിരുന്നു അദ്ദേഹം.

രാജ്യം സന്ദിഗ്ധ ഘട്ടത്തിലൂടെ കടന്നുപോകുമ്പോഴാണ് വിദ്യാർഥികളുടെ മഹാ പ്രസ്ഥാനം അരനൂറ്റാണ്ട് പിന്നിടുന്നത്. എസ്എഫ്ഐ പതാകയിൽ ആലേഖനംചെയ്ത സ്വാതന്ത്ര്യവും ജനാധിപത്യവും സോഷ്യലിസവും തകർത്തെറിയാനാണ് സ്ഥാപിതതാൽപ്പര്യങ്ങളുള്ള രാഷ്ട്രീയ ശക്തികൾ ശ്രമിക്കുന്നത്. പൊതുവിദ്യാഭ്യാസത്തിന്റെ മതേതര സ്വഭാവം തകർക്കാനുള്ള ശ്രമം അതിഹീനമായി മുന്നോട്ടുകൊണ്ടുപോകുകയാണ്. സോഷ്യലിസത്തെ മുതലാളിമാർക്കായി ബലികൊടുത്തു. മുതലാളിത്തത്തിനായി എല്ലാം അടിയറ വയ്ക്കുകയാണ്. മഹാമാരിയുടെ മറവിൽ രാജ്യത്തെ വിൽപ്പനയ്ക്കുവയ്ക്കുന്നു. ഇതിനെതിരായ പോരാട്ടം വർധിതവീര്യത്തോടെ മുന്നോട്ടുകൊണ്ടുപോകേണ്ട കാലമാണിത്.

കാർഷികമേഖലയെ കോർപറേറ്റ് ശക്തികൾക്ക് അടിയറ വയ്ക്കുന്നതിനെതിരെ കർഷകർ പോരാട്ടത്തിന്റെ പാതയിലാണ്. രാജ്യമൊന്നാകെ കർഷകർക്ക് ഐക്യദാർഢ്യം പ്രഖ്യാപിച്ചു നിലകൊള്ളുകയാണ്. ഈ പോരാട്ടത്തിൽ വിദ്യാർഥിസമൂഹത്തിനും വലിയ പങ്ക് വഹിക്കാനുണ്ട്. കേരളത്തിന്റെ ഇടതുപക്ഷ മനസ്സ് രൂപപ്പെടുത്തുന്നതിൽ എസ്എഫ്ഐയുടെ പങ്ക് ചെറുതല്ല. ഈ നാടിന്റെ ഇടതുപക്ഷ ഘടനയെ തകർക്കാനുള്ള ശ്രമങ്ങളെ എസ്എഫ്ഐ ത്യാഗോജ്വലമായി ചെറുത്തുനിന്നു. ഇതിനിടയിൽ നിരവധി പേർക്ക് ശാരീരികാക്രമണങ്ങൾ നേരിടേണ്ടിവന്നു. നിരവധി പേർ രക്തസാക്ഷികളായി.

വിദ്യാഭ്യാസരംഗത്തെ വരേണ്യവൽക്കരണത്തിനെതിരെ അതിശക്തമായ പോരാട്ടം എസ്എഫ്ഐ നയിച്ചു. പോരാട്ടങ്ങൾക്കൊപ്പം വിദ്യാഭ്യാസരംഗത്ത് ബദലുകൾ ഉയർത്തിക്കാട്ടാനും എസ്എഫ്ഐക്ക് കഴിഞ്ഞു. രാഷ്ട്രീയ പാർടികൾക്ക് പ്രവർത്തകരെ സംഭാവന ചെയ്യുന്ന സംവിധാനമല്ല വിദ്യാർഥി സംഘടന എന്ന് എസ്എഫ്ഐ തെളിയിച്ചു. സമൂഹത്തിന്റെ നാനാതുറകളിൽ അർപ്പണബോധത്തോടെ പ്രവർത്തിക്കുന്ന വലിയൊരു തലമുറയെ സൃഷ്ടിക്കാൻ ഈ പ്രസ്ഥാനത്തിന് കഴിഞ്ഞു. എസ്എഫ്ഐയിലൂടെ രംഗത്തുവന്നവർ പൊതുപ്രവർത്തനത്തിൽ ഇതര രാഷ്ട്രീയ പ്രവർത്തകർക്ക് മാതൃകയായി- മുഖ്യമന്ത്രി പറഞ്ഞു.