പാലക്കാട്‌ നഗരസഭയിലെ 'ജയ് ശ്രീറാം' ബാനർ; ബിജെപി പ്രവർത്തകർക്കെതിരെ കേസെടുത്തു

പാലക്കാട് > തദ്ദേശ തെരഞ്ഞെടുപ്പ് വോട്ടെണ്ണൽ ദിനത്തിൽ പാലക്കാട് നഗരസഭാ മന്ദിരത്തിൽ ബിജെപി പ്രവർത്തകർ ജയ് ശ്രീറാം ഫ്ലക്സ് തൂക്കിയ സംഭവത്തിൽ പൊലീസ് കേസെടുത്തു. നഗരസഭാ സെക്രട്ടറിയുടെ പരാതിയില് ടൗണ് പൊലീസാണ് കേസെടുത്തത്. വിഷയത്തില് പാലക്കാട് എസ്പി സ്പെഷ്യൽ ബ്രാഞ്ച് ഡിവൈഎസ്പിയോട് റിപ്പോര്ട്ട് ആവശ്യപ്പെട്ടു.

ഐപിസി 153 പ്രകാരമാണ് കേസ്. ഇരുവിഭാഗങ്ങൾക്കിടയിൽ മനഃപൂർവം പ്രശ്നമുണ്ടാക്കുക എന്ന ലക്ഷ്യത്തോടെ പ്രവർത്തിച്ചു എന്നതാണ് കേസ്.

ഭരണഘടനാ സ്ഥാപനമായ മുനിസിപ്പൽ ഓഫീസിന് മുകളിൽ കയറി ഹിന്ദുത്വ മുദ്രാവാക്യം മുഴക്കുകയും 'ജയ് ശ്രീറാം' എന്ന ബാനർ ചുവരിൽ വിരിക്കുകയും ചെയ്തത് ബിജെപി നേതാക്കളുടെ അറിവോടെ സംഘപരിവാർ പ്രവർത്തകരെ ഉപയോഗിച്ചാണ്.