അടിച്ചമര്‍ത്താന്‍ ശ്രമിക്കുംതോറും കരുത്താര്‍ജിക്കുന്നു; ഗൂഢാലോചന പൊളിഞ്ഞു: പി‌ കൃഷ്‌ണപ്രസാദ്‌

സിൻഘു> ബിജെപി സർക്കാർ അടിച്ചമർത്താൻ ശ്രമിക്കുംതോറും കർഷകസമരം കൂടുതൽ കരുത്താർജിക്കുമെന്ന് കിസാൻസഭ ഫിനാൻസ് സെക്രട്ടറി പി കൃഷ്ണപ്രസാദ്. സിൻഘു അതിർത്തിയിൽ ഉപവാസത്തിലുള്ള കർഷകരെ അഭിസംബോധന ചെയ്യുകയായിരുന്നു അദ്ദേഹം. കർഷകസമരം അക്രമസമരമെന്ന് വരുത്താൻ വലിയ ഗൂഢാലോചന നടക്കുന്നു. റിപ്പബ്ലിക് ദിനത്തിലെ ഒറ്റപ്പെട്ട സംഭവം അതിന്റെ ഭാഗമാണ്.

കർഷകസംഘടനകൾ തീരുമാനിച്ചിരുന്നെങ്കിൽ ചെങ്കോട്ട തന്നെ സമരകേന്ദ്രമാകുമായിരുന്നു. അതിന് ശ്രമിക്കാത്തത് കർഷകസംഘടനകളുടെ ദൗർബല്യമായി മോഡി സർക്കാർ കാണരുത്.
സമരകേന്ദ്രത്തിന് നേരെ ആക്രമണം നടത്തുന്നത് ബിജെപിക്കാരാണ്. ഇത്തരം പ്രകോപനങ്ങളിൽ കർഷകർ വീഴില്ല. മൂന്ന് നിയമവും പിൻവലിക്കുംവരെ സമരം തുടരും.–- കൃഷ്ണപ്രസാദ് പറഞ്ഞു. നേതാക്കളും കർഷകർക്കൊപ്പം ഉപവസിച്ചു. തിക്രി, ഷാജഹാൻപുർ, ഗാസിപുർ എന്നീ സമരകേന്ദ്രങ്ങളിലും കർഷകർ ഉപവസിച്ചു. ഡൽഹിയിലെ സുർജിത് ഭവനിൽ കിസാൻസഭ നേതാക്കൾ ഉപവസിച്ചു.