രോ​ഗമില്ലാത്തവരുടെ ഫോണ്‍നമ്പര്‍ ‘0000000000’ ; ബിഹാര്‍ കോവിഡിനെ "ചെറുത്തത്' ഇങ്ങനെ

ന്യൂഡൽഹി
ബിഹാറിൽ കോവിഡ് കണക്കുകളിലെ തട്ടിപ്പിന്റെ കൂടുതല് വിശദാംശങ്ങൾ പുറത്ത്. ജമുയ് ജില്ലയിലെ ബർഹാത്ത് പ്രാഥമിക ആരോഗ്യകേന്ദ്രത്തിൽ ജനുവരി 16ന് കോവിഡ് പരിശോധിച്ചെന്ന് രേഖയുള്ള 48ൽ 28 പേരുടെയും ജനുവരി 25ലെ പട്ടികയിലുള്ള 83ൽ 46 പേരുടെയും മൊബൈൽനമ്പർ ‘0000000000’ എന്നാണെന്ന് ‘ഇന്ത്യൻ എക്സ്പ്രസ്’ റിപ്പോർട്ട് ചെയ്തു. മറ്റൊരു പ്രാഥമിക ആരോഗ്യകേന്ദ്രമായ ജമുയ് സദറിൽ ജനുവരി 16ലെ പട്ടികയിലുള്ള 150ൽ 73 പേരും ‘സംപൂജ്യര്’.

ജമുയ് ജില്ലയിലെ ആറ് പ്രാഥമിക ആരോഗ്യകേന്ദ്രത്തില് പരിശോധനപട്ടികയിലുള്ള 885 പേരെ ഇതുവരെ കണ്ടെത്താനായിട്ടില്ല. മേല്വിലാസവും ഫോൺനമ്പറും വ്യാജം. നൽകിയ ഫോണ്നമ്പറുകൾ പലതും നിലവിലില്ലാത്തവ, അല്ലെങ്കില് മറ്റ് സംസ്ഥാനങ്ങളിലോ ജില്ലകളിലോ ഉള്ളവരുടേത്. ഷെയ്ക്ക്പുരയിലെ ആരോഗ്യകേന്ദ്രങ്ങളിൽ ജനുവരി 21, 28 തീയതികളിൽ പരിശോധിച്ചവരുടെ പട്ടികയിലെ 245 പേരിൽ 205 പേരുടെയും വിശദാംശം രേഖപ്പെടുത്താനുള്ള കള്ളികളിൽ ഒന്നും രേഖപ്പെടുത്തിയിട്ടില്ല.

കോവിഡ് നിയന്ത്രണവിധേയമെന്ന് അവകാശപ്പെടുന്ന സംസ്ഥാനത്തിലെ കണക്കിലെ തട്ടിപ്പ് പുറത്തായതോടെ ആരോഗ്യമേഖല ആശങ്കയിലാണ്. മറ്റ് സംസ്ഥാനങ്ങളിലും സമാന തട്ടിപ്പ് അരങ്ങേറുന്നതായി ആക്ഷേപമുണ്ട്. എന്നാൽ, അതേക്കുറിച്ച് അന്വേഷിക്കാനോ സംസ്ഥാനങ്ങളുടെ അവകാശവാദത്തിന്റെ ആധികാരികത പരിശോധിക്കാനോ ദേശീയതലത്തില് സംവിധാനമില്ല. കൃത്യമായ പരിശോധനയും മേൽനോട്ടവും ഉറപ്പാക്കിയില്ലെങ്കിൽ ഭാവിയിൽ വലിയ പ്രത്യാഘാതത്തിന് ഇടയാക്കുമെന്ന ആശങ്ക ആരോ​ഗ്യമേഖലയിലെ വിദ​ഗ്ധര്ക്കുണ്ട്.