വോട്ടർമാരുടെ എണ്ണം എഴുപത്തിയഞ്ചു ലക്ഷത്തിൽ നിന്ന് 2.67 കോടിയിലേക്ക്

കൊച്ചി > സംസ്ഥാനത്ത് ആദ്യ തെരഞ്ഞെടുപ്പിൽ നിന്ന് പതിനഞ്ചാം തെരഞ്ഞെടുപ്പിലേക്കെത്തുമ്പോൾ വോട്ടർമാരുടെ എണ്ണം മൂന്നര ഇരട്ടിയായി.

1957 ൽ കേരളത്തിൽ ആദ്യത്തെ തെരഞ്ഞെടുപ്പിൽ വോട്ടർമാരുടെ ആകെ എണ്ണം എഴുപത്തിയഞ്ചു ലക്ഷമായിരുന്നു. കൃത്യമായി പറഞ്ഞാൽ 75,14,626. ഇപ്പോൾ നടക്കാനിരിക്കുന്ന നിയമസഭാ തെരഞ്ഞെടുപ്പിൽ വോട്ടർമാരുടെ ഇതുവരെയുള്ള എണ്ണം രണ്ടരക്കോടിയിലേറെ (2,67,31,509). 64 കൊല്ലം കൊണ്ടാണ് വോട്ടർമാരുടെ എണ്ണം മൂന്നര ഇരട്ടിയായത്.

എല്ലാ തെരെഞ്ഞെടുപ്പിലും സ്ത്രീ വോട്ടർമാരായിരുന്നു കേരളത്തിൽ കൂടുതൽ. ഇപ്പോഴത്തെ പട്ടികയിൽ 1,37,79,263 സ്ത്രീകളും 1,29,52,025 പുരുഷന്മാരുമാണുള്ളത്. പുരുഷന്മാരേക്കാൾ 8,27,598 സ്ത്രീ വോട്ടർമാർ കൂടുതൽ. ട്രാൻസ്ജെൻഡർ വിഭാഗത്തിൽ 221 പേരുമുണ്ട്.