അഡ്‌മിനിസ്‌ട്രേറ്ററെത്തി; 
കരിങ്കൊടി ഉയർത്തി ദ്വീപ്‌

കൊച്ചി
പ്രതിഷേധം ഭയന്ന് കൊച്ചിയിലൂടെയുള്ള യാത്ര ഒഴിവാക്കി ലക്ഷദ്വീപ് അഡ്മിനിസ്ട്രേറ്റർ പ്രഫുൽ കെ പട്ടേൽ അഗത്തിയിലെത്തി. സേവ് ലക്ഷദ്വീപ് ഫോറത്തിന്റെ നേതൃത്വത്തിൽ കരിങ്കൊടിയും പ്ലക്കാർഡും ഉയർത്തി ദ്വീപ് ജനത പ്രതിഷേധിച്ചു. വീടുകളിൽ ഉയർത്തിയ കരിങ്കൊടി മാറ്റണമെന്ന് പൊലീസ് ആവശ്യപ്പെട്ടെങ്കിലും ദ്വീപുവാസികൾ വഴങ്ങിയില്ല. ചിലയിടങ്ങളിൽ പൊലീസ് നേരിട്ടെത്തി കരിങ്കൊടി നീക്കി.

ചുമതല ഏറ്റെടുത്തശേഷം മൂന്നാംവട്ടമാണ് പട്ടേൽ ലക്ഷദ്വീപിലെത്തുന്നത്. മുമ്പ് രണ്ടുതവണയും കൊച്ചിയിലൂടെയായിരുന്നു യാത്ര. വിവിധ സംഘടനകൾ നെടുമ്പാശേരിയിൽ പ്രതിഷേധത്തിന് തയ്യാറെടുത്തിരുന്നു. എന്നാൽ, അവസാന നിമിഷം യാത്ര ദാമൻ ദിയുവിൽനിന്ന് എയർഫോഴ്സ് വിമാനത്തിലാക്കി. ഗോവ വഴി പകൽ പന്ത്രണ്ടരയോടെ അഡ്മിനിസ്ട്രേറ്റർ അഗത്തിയിൽ വിമാനമിറങ്ങി. ഒന്നോടെ കവരത്തിയിലെത്തി. അഡ്മിനിസ്ട്രേറ്ററെ കാണാൻ സേവ് ലക്ഷദ്വീപ് ഫോറം ഭാരവാഹികൾ അനുമതി തേടിയെങ്കിലും നൽകിയിട്ടില്ല.