ആംബർഗ്രീസിന്‌ പിന്നിൽ വൻ ‘തിമിംഗലങ്ങൾ’ ; പ്രതികൾ റിമാൻഡിൽ

തൃശൂർ > സുഗന്ധലേപന വിപണിയിൽ കോടികൾ വിലമതിക്കുന്ന തിമിംഗലത്തിന്റെ ഛർദിൽ (ആംബർ ഗ്രീസ്) കടത്തിയ സംഭവത്തിൽ വൻറാക്കറ്റെന്ന് സൂചന. ഗൾഫുമായി ബന്ധമുള്ള മലപ്പുറം തിരൂരിലെ റാക്കറ്റാണ്ഇതിനുപിന്നിലെന്നാണ് പ്രതികളെ ചോദ്യം ചെയ്തതിൽ നിന്ന് ലഭിച്ച സൂചന. ആംബർഗ്രീസിന്റെ ഉറവിടത്തെക്കുറിച്ച് അന്വേഷണം ഊർജിതമാക്കി. പ്രതികളെ കോടതിയിൽ ഹാജരാക്കി. ആംബർഗ്രീസിന്റെ സാമ്പിൾ തിരുവനന്തപുരം രാജീവ്ഗാന്ധി സെന്റർ ഫോർ ബയോടെക്നോളജിയിലേക്ക് ശാസ്ത്രീയ പരിശോധനക്ക് അയച്ചു.

വാടാനപ്പള്ളി സ്വദേശി റഫീഖ്, പാലയൂർ സ്വദേശി ഫൈസൽ, എറണാകുളം സ്വദേശി ഹംസ എന്നിവരെയാണ് ചേറ്റുവയിൽവച്ച് വനം വിജിലൻസിന്റെ നേതൃത്വത്തിലുള്ള സംഘം ആംബർഗ്രീസുമായി പിടികൂടിയത്. പ്രതികളെ പട്ടിക്കാട് ഫോറസ്റ്റ് ഡിവിഷന് കൈമാറി. ചാവക്കാട് ജുഡിഷ്യൽ മജിസ്ട്രേറ്റ് കോടതി റിമാൻഡ് ചെയ്തു. തൊണ്ടിമുതലും കോടതിയിൽ ഹാജരാക്കി. പ്രതികളെ തിങ്കളാഴ്ച വീണ്ടും കസ്റ്റഡിയിലെടുത്ത് ചോദ്യം ചെയ്യുന്നതിന് കോടതിയിൽ അപേക്ഷ നൽകി.

ആംബർഗ്രീസ് കടലിൽനിന്ന് കിട്ടിയതാണെന്നാണ് പ്രതികൾ ആദ്യം മൊഴി നൽകിയത്. പിന്നീടാണ് തിരൂർ ബന്ധത്തെപ്പറ്റി സൂചന നൽകിയത്. ആംബർഗ്രീസിന് 19 കിലോ ഭാരമുണ്ട്. സുഗന്ധലേപന മാർക്കറ്റിൽ 30 കോടിയോളം വില ലഭിക്കും. വൈൽഡ്ലൈഫ് ക്രൈം കൺട്രോൾ ബ്യൂറോയുടെ കൊച്ചിയിലെ യൂണിറ്റ്, എറണാകുളം ഫ്ലൈയിങ് സ്ക്വാഡ്, തൃശൂർ ഡിഎഫ്ഒ എന്നിവരുടെ മേൽനോട്ടത്തിലാണ് പിടികൂടിയത്.