നെഹ്റുവിനെ ഒഴിവാക്കൽ: വിശദീകരണവുമായി ഐസിഎച്ച്ആർ

ന്യൂഡൽഹി > വെബ്സൈറ്റിലെ സ്വാതന്ത്ര്യസമര നേതാക്കളുടെ ചിത്രങ്ങളിൽനിന്ന് ജവാഹർലാൽ നെഹ്റുവിനെ ഒഴിവാക്കിയതിൽ വിശദീകരണവുമായി ഇന്ത്യൻ ചരിത്ര ഗവേഷണ കൗൺസിൽ (ഐസിഎച്ച്ആർ).

ഇത് പരിപാടിയുടെ ആദ്യഘട്ട പോസ്റ്റർ മാത്രമാണെന്നും അടുത്ത പോസ്റ്ററിൽ നെഹ്റുവിനെയും ഉൾപ്പെടുത്തുമെന്നും ഐസിഎച്ച്ആറിലെ ഒരു ഉന്നത ഉദ്യോ​ഗസ്ഥൻ പറഞ്ഞു. ഇപ്പോൾ നടക്കുന്നത് അനാവശ്യ വിവാദമാണെന്നും അദ്ദേഹം പറഞ്ഞു.

‘സ്വാതന്ത്ര്യത്തിന്റെ അമൃതോത്സവം’ എന്ന പേരിൽ ഐസിഎച്ച്ആർ സംഘടിപ്പിക്കുന്ന സ്വാതന്ത്ര്യത്തിന്റെ 75–-ാം വാർഷികാഘോഷ പോസ്റ്ററിൽനിന്നാണ് നെഹ്റുവിനെ ഒഴിവാക്കിയത്. എന്നാൽ, ബ്രിട്ടീഷുകാരോട് പലവട്ടം മാപ്പപേക്ഷിച്ച വി ഡി സവർക്കറുടെ ചിത്രം ആമുഖപേജില് ഉൾപ്പെടുത്തിയിട്ടുണ്ട്. ഗാന്ധിവധ ഗൂഢാലോചനക്കേസിൽ പ്രതിയുമായിരുന്നു സവർക്കർ.