ജിഡിപി = ഗ്യാസ്‌, ഡീസൽ, പെട്രോൾ വില വർധന:- രാഹുൽ ഗാന്ധി

ന്യൂഡൽഹി
പാചകവാതകത്തിനും ഡീസലിനും പെട്രോളിനും വില വർധിപ്പിക്കുന്നതാണ് കേന്ദ്രസർക്കാരിന്റെ നോട്ടത്തിൽ ജിഡിപി വർധനയെന്ന് കോൺഗ്രസ് നേതാവ് രാഹുൽ ഗാന്ധി. ഏഴുവർഷംകൊണ്ട് ഇവയുടെ വില വർധിപ്പിച്ച് 23 ലക്ഷം കോടിരൂപ കേന്ദ്രം വസൂലാക്കി.

ഈ പണം എവിടെപ്പോകുന്നുവെന്ന് ജനത്തിന് അറിയില്ല. സാധാരണക്കാരുടെ കെെയിൽനിന്നുള്ള പണം നരേന്ദ്ര മോദിയുടെ നാലഞ്ച് സുഹൃത്തുക്കൾക്കാണ് പോകുന്നത്. കർഷകർ, തൊഴിലാളികൾ, കച്ചവടക്കാർ, അസംഘടിത, ചെറുകിട, കരാർ തൊഴിലാളികൾ, ശമ്പളക്കാർ, സത്യസന്ധരായ വ്യവസായികൾ തുടങ്ങിയവരുടെ കെെയിൽനിന്നാണ് കേന്ദ്രം പണം പിടിക്കുന്നതെന്നും വാർത്താസമ്മേളനത്തിൽ രാഹുൽ പറഞ്ഞു.