നിപാ: ചാത്തമംഗലത്തും സമീപ പ്രദേശങ്ങളിലും നിയന്ത്രണം ശക്‌തമാക്കി

കോഴിക്കോട് > നിപ ബാധിച്ച് പന്ത്രണ്ട് വയസുകാരൻ മുഹമ്മദ് ഹാഷിം മരണപ്പെട്ട ചാത്തമംഗലത്തിന്റെ മൂന്ന് കിലോമീറ്റർ ചുറ്റളവിലുള്ള പ്രദേശങ്ങളിൽ നിയന്ത്രണം ശക്തമാക്കുന്നു. രാവിലെ ഒൻപത് മണിയോടെയാണ് നിയന്ത്രണങ്ങൾ മുക്കം പൊലീസ് കർശനമാക്കിയത്.

മൂന്ന് കിലോമീറ്റർ ചുറ്റളവിലുള്ള മുക്കം നഗരസഭ, കൊടിയത്തൂർ പഞ്ചായത്ത് എന്നിവിടങ്ങളിലെ വിവിധ പ്രദേശങ്ങളിൽ ബാരിക്കേഡ് വെച്ച് ഗതാഗതം നിയന്ത്രിക്കുന്നു.

മൂന്നു കിലോമീറ്റർ ചുറ്റളവിൽ ഉള്ളവർക്ക് പുറത്തേക്ക് പോകാനോ പുറത്തുനിന്നുള്ളവർക്ക് കണ്ടെയ്ൻമെന്റ് സോൺ ആയി പ്രഖ്യാപിച്ച ഭാഗത്തേക് പ്രവേശിക്കാനോ അനുമതി ഇല്ല. അതേസമയം, അവശ്യസാധന സേവനങ്ങൾക്കായുള്ള കടകൾക്ക് രാവിലെ ഏഴ് മണി മുതൽ ഉച്ചയ്ക്ക് രണ്ട് മണി വരെ തുറന്നു പ്രവർത്തിക്കാവുന്നതാണെന്ന് അധികൃതർ അറിയിച്ചു.