ആർഎസ്‌എസിനെ താലിബാനോട്‌ ഉപമിച്ചു ; ജാവേദ്‌ അക്തറിന്റെ ചിത്രങ്ങൾ തടയുമെന്ന്‌ ബിജെപി എംഎൽഎ

മുംബൈ
ആർഎസ്എസിനെ താലിബാനോട് ഉപമിച്ചതിന് മാപ്പ് പറയാതെ ഗാനരചയിതാവും എഴുത്തുകാരനുമായ ജാവേദ് അക്തറിന്റെ സിനിമകൾ ഇന്ത്യയിൽ പ്രദർശിപ്പിക്കില്ലെന്ന് ബിജെപി എംഎൽഎ റാം കദം.

ആർഎസ്എസിനെയും വിശ്വഹിന്ദു പരിഷത്തി (വിഎച്ച്പി)നെയും ബംജ്രംഗദളിനെയും പിന്തുണയ്ക്കുന്നവർ ആത്മപരിശോധന നടത്തണമെന്ന് കഴിഞ്ഞ ദിവസം എൻഡിടിവിയിൽ നടന്ന ചർച്ചയിൽ ജാവേദ് അക്തർ പറഞ്ഞിരുന്നു. താലിബാൻ തീർച്ചയായും പ്രാകൃതരാണ്. ഈ സംഘടനകളെ പിന്തുണയ്ക്കുന്നവരും അങ്ങനെയാണെന്ന് അക്തർ പറഞ്ഞു. തുടർന്നാണ് മഹാരാഷ്ട്ര ബിജെപി എംഎൽഎ റാം കദമിന്റെ ഭീഷണി. സംഘപരിവാറുമായി ബന്ധപ്പെട്ടവരാണ് രാജ്യം ഭരിക്കുന്നത്. താലിബാന് സമാനമായ ഭരണമായിരുന്നു ഇവിടെയെങ്കിൽ ജാവേദ് അക്തറിന് ഇത്തരത്തിൽ പ്രതികാരിക്കാനാകില്ലെന്നും റാം കദം ട്വിറ്ററിൽ പങ്കുവച്ച വീഡിയോയിൽ പറഞ്ഞു. സംഘപരിവാർ പ്രവർത്തകരോട് മാപ്പ് പറയാതെ അക്തറിന്റെയും കുടുംബാംഗങ്ങളുടെയും സിനിമകൾ പ്രദർശിപ്പിക്കാൻ അനുവദിക്കില്ലെന്ന് എംഎൽഎ പറഞ്ഞു.