പാരാലിമ്പിക്‌സിലെ നക്ഷത്രങ്ങൾ ‘കെഎസ്‌ആർടിസിയിൽ’

തിരുവനന്തപുരം
ടോക്യോ പാരാലിമ്പിക്സിൽ ഇന്ത്യക്കായി മെഡൽനേടിയ 17 താരങ്ങൾക്ക് ആദരവുമായി കെഎസ്ആർടിസി. ഇവരുടെ ചിത്രം ആലേഖനം ചെയ്ത വിനൈൽ സ്റ്റിക്കറുകൾ ബസിൽ പതിച്ചു. തിരുവനന്തപുരം നഗരത്തിൽ വേളിയിലേക്ക് സർവീസ് നടത്തുന്ന ആർഎൻഎ 492 നമ്പർ ബസിലാണ് സ്റ്റിക്കർ പതിച്ചത്.

അവനി ലേഖറ, പ്രമോദ് ഭഗത്ത്, കൃഷ്ണ നാഗർ, സുമിത് ആന്റിൽ, മനീഷ് നർവാൾ, ഭവിനബെൻ പട്ടേൽ, സിങ്രാജ് അധാന, യോഗേഷ് കതുനിയ, നിഷാദ് കുമാർ, മാരിയപ്പൻ തങ്കവേലു, പ്രവീൺ കുമാർ, ദേവേന്ദ്ര ജചാരിയ, സുഹാസ് യതിരാജ്, ഹർവിന്ദർ സിങ് , ശരത് കുമാർ, സുന്ദർ സിങ് ഗുർജാർ, മനോജ് സർക്കാർ എന്നിവരുടെ ചിത്രമാണ് ആലേഖനം ചെയ്തിരിക്കുന്നത്.

കെഎസ്ആർടിസി സോഷ്യൽ മീഡിയ സെല്ലിലെ ഗ്രാഫിക് ഡിസൈനറായ എ കെ ഷിനുവാണ് ഇതിന്റെ ഡിസൈൻ തയ്യാറാക്കിയത്. സിറ്റി ഡിപ്പോയിലെ ജീവനക്കാരനായ വി മഹേഷ് കുമാറാണ് ബസ് അണിയിച്ചൊരുക്കിയത്.

നേരത്തെ ടോക്യോ ഒളിമ്പിക്സിൽ മെഡൽ നേടിയ പി ആർ ശ്രീജേഷിനും കെഎസ്ആർടിസി ആദരവ് സമർപ്പിച്ചിരുന്നു. പുതുതായി രൂപീകരിച്ച കൊമേഷ്സ്യൽ വിഭാഗത്തിന്റെ നേതൃത്വത്തിലാണ് കായിക താരങ്ങൾക്ക് ആദരവ് സമർപ്പിക്കുന്ന പദ്ധതി നടപ്പാക്കിയത്.