കെട്ടിടത്തിലെ മനുഷ്യാസ്ഥികൂടം വൈദ്യപഠനത്തിന്​ ഉപയോഗിച്ചത്

ആലപ്പുഴ
നഗരത്തിൽ കല്ലുപാലത്തിന് സമീപം പഴയകെട്ടിടം പൊളിക്കുന്നതിനിടെ കണ്ടെത്തിയ മനുഷ്യാസ്ഥികൂടങ്ങൾ വൈദ്യപഠനത്തിന്​ ഉപയോഗിച്ചതാണെന്ന്​ ശാസ്​ത്രീയ പരിശോധനഫലം. ആലപ്പുഴ മെഡിക്കൽ കോളേജ് ആശുപത്രിയിലെ ഫോറൻസിക് സർജൻ രഞ്ജുവിന്റെ നേതൃത്വത്തിൽ നടത്തിയ വിശദ പരിശോധനയിലാണ് കണ്ടെത്തൽ. പോസ്​റ്റുമോർട്ടം റിപ്പോർട്ട്​ കിട്ടിയാൽ അസ്ഥികൂടത്തിന്റെ കാലപ്പഴക്കം അടക്കമുള്ള കാര്യങ്ങളിൽ കൂടുതൽ വ്യക്തത വരുമെന്ന് ​​ പൊലീസ്​ പറഞ്ഞു.

പൊലീസ്​ സർജനും മെഡിക്കൽകോളേജ്​ ഫോറൻസിക്​ വിഭാഗവും ചേർന്നാണ്​ അസ്ഥികൂട പരിശോധന പൂർത്തിയാക്കിയത്. ​ പൊലീസിന്​ കൈമാറിയ റിപ്പോർട്ടിലാണ് ഇവ വൈദ്യപഠനത്തിന് ഉപയോഗിച്ച കാര്യം ​സൂചിപ്പിക്കുന്നത്​. മെഡിക്കൽ വിദ്യാർഥികൾ പഠിക്കുന്നതിന്​ പല മൃതദേഹങ്ങളിൽനിന്ന്​ ശേഖരിച്ച അസ്ഥികളാണിതെന്നാണ്​ ​​നിഗമനം. ഇവ ഉപയോഗിച്ചത് ആരെന്ന് കണ്ടെത്തും. ഇതിനായി ഇവിടെ വാടകയ്ക്ക്​ താമസിച്ച ഡോക്​ടർമാർ, മെഡിക്കൽ വിദ്യാർഥികൾ അടക്കമുള്ളവരുടെ മൊഴിയെടുക്കും.

പഴയകെട്ടിടം പൊളിക്കുന്നതിനിടെ രണ്ട് തലയോട്ടികൾ, കൈകൾ, വാരിയെല്ലുകൾ എന്നിവയുടെ ഭാഗങ്ങളാണ് കണ്ടെത്തിയത്​. പ്ലാസ്​റ്റിക് കവറിൽ പൊതിഞ്ഞ നിലയിലായിരുന്നു അസ്ഥികൂടങ്ങൾ.