മെട്രോ പാളത്തിന്‌ ചരിവ്‌: മണ്ണിന്റെ ഘടന പരിശോധിക്കും ; സർവീസിനെ ബാധിക്കില്ല

കൊച്ചി
കൊച്ചി മെട്രോ പാളത്തിനുണ്ടായ നേരിയ ചരിവ് തൂണിന്റെ പൈൽ ഉറപ്പിച്ചിരിക്കുന്ന പാറയ്ക്കുണ്ടായ ലഘു വ്യതിയാനത്താലെന്ന് പ്രാഥമിക നിഗമനം. ഇടപ്പള്ളി പത്തടിപ്പാലത്ത് 347–--ാം തൂണിനുസമീപമാണ് ചരിവ്.

കൂടുതൽ സാങ്കേതിക പരിശോധന നടക്കുകയാണ്. ഇവിടെ ട്രെയിൻ വേഗംകുറച്ചാണ് ഓടുന്നത്. ഏഴു മീറ്റർ ആഴത്തിലാണ് പൈൽ. ഇതിനുമുകളിലുള്ള പൈൽ ക്യാപ്പിൽനിന്നാണ് മെ ട്രോയുടെ തൂണ്(പിയർ). ഒരു തൂണിന് അടിയിൽ നാല് പൈലുണ്ട്. 347–--ാം തൂണിന്റെ പൈൽ പാറയ്ക്കുമുകളിലാണ്. ഇതിന് വ്യതിയാനമുണ്ടായോ എന്നാണ് പരിശോധിക്കുന്നത് ഇതിനൊപ്പം മണ്ണിന്റെ ഘടനയും പരിശോധിക്കും. ഡിഎംആർസി സാങ്കേതികവിദഗ്ധരുടെ സഹായവും തേടി.

രണ്ടാഴ്ചമുമ്പ് പതിവ് സാങ്കേതിക പരിശോധനയിലാണ് ചരിവ് കണ്ടെത്തിയത്. പ്രശ്നം മെട്രോ സർവീസിനെ ബാധിക്കില്ലെന്ന് കെഎംആർഎൽ അറിയിച്ചു. യാത്രക്കാർ ആശങ്കപ്പെടേണ്ടതില്ല.