കാർക്കിനോസിന്റെ ക്യാൻസർ ലാബ്‌ 
മുഖ്യമന്ത്രി ഇന്ന്‌ നാടിന്‌ സമർപ്പിക്കും

കൊച്ചി
അർബുദചികിത്സയ്ക്ക് അമേരിക്കയിലെ മയോക്ലിനിക്കുമായി സഹകരിച്ച് ഇന്ത്യൻ കമ്പനിയായ കാർക്കിനോസ് കൊച്ചിയിൽ സ്ഥാപിച്ച ആധുനിക ലാബ് ശനി പകൽ മൂന്നിന് മുഖ്യമന്ത്രി പിണറായി വിജയൻ നാടിന് സമർപ്പിക്കും. സ്റ്റേഡിയം മെട്രോ സ്റ്റേഷന്റെ മൂന്നാംനിലയിൽ നടക്കുന്ന ചടങ്ങിൽ, ക്യാൻസർ റിസർച്ച് ലബോറട്ടറി വ്യവസായമന്ത്രി പി രാജീവും എച്ച്പിവി ടെസ്റ്റിങ് ആൻഡ് സെർവിക്കൽ ക്യാൻസർ കൺട്രോൾ സർവീസ് ആരോഗ്യമന്ത്രി വീണാ ജോർജും ഉദ്ഘാടനം ചെയ്യും. ആരോഗ്യ സർവകലാശാല വൈസ് ചാൻസലർ ഡോ. മോഹൻ കുന്നുമ്മേൽ അധ്യക്ഷനാകും.

സ്റ്റേഡിയം മെട്രോ സ്റ്റേഷന്റെ മൂന്നാംനിലയിലാണ് 15,000 ചതുരശ്രയടിയിൽ ലാബ് പ്രവർത്തനം ആരംഭിക്കുന്നത്. ഡോക്ടർമാർ ഉൾപ്പെടെ 35 ജീവനക്കാരുണ്ടാകും. കോതമംഗലം, മൂന്നാർ, തൊടുപുഴ എന്നിവിടങ്ങളിലും കാർക്കിനോസിന് അർബുദ പരിചരണകേന്ദ്രങ്ങളുണ്ട്.

കാർക്കിനോസിൽ 100 കോടി രൂപ മുടക്കിയ രത്തൻ ടാറ്റയാണ് പ്രധാന നിക്ഷേപകൻ. ബയോടെക്നോളജി കമ്പനിയായ റാക്കൂടെൻ, റിലയൻസ് ഡിജിറ്റൽ ഹബ്ബ്, സംരംഭകരായ വേണു ശ്രീനിവാസ്, ക്രിസ് ഗോപാലകൃഷ്ണൻ, റോണി സ്ക്രൂവാല, ശേഖർ ശർമ തുടങ്ങിയവർക്കും നിക്ഷേപമുണ്ട്.