വി കൺസോളിന്റെ പുത്തൻപതിപ്പുമായി ടെക്‌ജെൻഷ്യ ; ആഫ്രിക്ക കോമിൽ കേരളത്തിന്റെ സാന്നിധ്യം

മാരാരിക്കുളം (ആലപ്പുഴ)
വിവിധ സർക്കാരുകൾക്കും എന്റർപ്രൈസുകൾക്കും ഉപയോഗിക്കാവുന്ന വി കൺസോളിന്റെ പുതിയ പതിപ്പ് ആഫ്രിക്ക ടെക് ഫെസ്റ്റിവലിൽ അവതരിപ്പിക്കും. കേന്ദ്ര സർക്കാരിന്റെ ഔദ്യോഗിക വീഡിയോ കോൺഫറൻസ് പ്ലാറ്റ്ഫോമായ ഭാരത് വി സിയുടെ നിർമാതാക്കളായ ടെക്ജെൻഷ്യ സിഇഒ മാരാരിക്കുളം സ്വദേശിയായ ജോയ് സെബാസ്റ്റ്യനും സംഘവും തന്നെആണ് പുതിയ പതിപ്പിന് പിന്നിൽ.

സർക്കാരുകളുടെയും മിലിട്ടറി, പൊലീസ്, ഗവേഷണസ്ഥാപനങ്ങളുടെയും സുരക്ഷ, സ്വകാര്യത എന്നിവയ്ക്ക് പ്രാധാന്യം നൽകുന്നതാണ് പുതിയപതിപ്പ്. സ്ഥാപനങ്ങൾക്ക് അവരുടെ നിലവിലുള്ള സെക്യൂർ ലോഗിൻ ഉപയോഗിച്ച് തന്നെ വിഡിയോ കോൺഫറൻസ് ഉപയോഗിക്കാവുന്നതരത്തിൽ സിംഗിൾ സൈൻ ഓൺ, ഓരോ മീറ്റിങ്ങിലും പങ്കെടുക്കുന്നവരെ കൃത്യമായി തിരിച്ചറിയാൻ മൾട്ടി ഫാക്ടർ ഓതെന്റിക്കേഷൻ, ലോക്കൽ ഓൺ പ്രിമിസസ് ഇൻസ്റ്റല്ലേഷൻ, ഇന്റർനെറ്റിലെ ബോട്ടുകളുടെ ആക്രമണങ്ങൾ തടയുന്ന അത്യാധുനികസംവിധാനങ്ങൾ എന്നിവ പുതിയ പതിപ്പിപ്പിന്റെ സവിശേഷതയാണ്. വിഐപി കോൺഫറൻസുകൾ ഡാറ്റ ചോരാതെ പിന്നണിയിൽനിന്ന് മാനേജ് ചെയ്യാവുന്ന ഫീച്ചറുകളുമുണ്ട്. ഒരു മീറ്റിങ്ങിൽ പരമാവധി 100 പേർക്ക് ആക്റ്റീവ് ആയും 200 പേർക്ക് പാസീവായും പങ്കെടുക്കാമായിരുന്ന ആദ്യ വേർഷനിൽനിന്ന് വ്യത്യസ്തമായി പുതിയ വേർഷനിൽ 250 പേർക്ക് ആക്റ്റീവായും 500 പേർക്ക് പാസീവായും വിർച്വൽ മീറ്റിങ്ങുകളിൽ വി കൺസോൾ വഴി പങ്കെടുക്കാം.

ആഫ്രിക്കയിലെ ഏറ്റവും വലിയ ടെക് ഇവന്റായ ആഫ്രിക്ക കോമിലാണ് നാസ്കോം, ഇന്ത്യ ഡെലിഗേഷന്റെ ഭാഗമായി ടെക്ജെൻഷ്യ പങ്കെടുക്കുക. ഏഴു മുതൽ 11 വരെ ദക്ഷിണ ആഫ്രിക്കയിലെ കേപ്പ് ടൗണിലാണ് പരിപാടി. ഫെസ്റ്റിവലിൽ ജോയ് സെബാസ്റ്റ്യനൊപ്പം മാർക്കറ്റിങ് ഹെഡ് ഡെന്നിസ് അറയ്ക്കലും പങ്കെടുക്കും.

Credits Kerala || Deshabhimani ​Online ​News https://ift.tt/sl6QDLh