പ്രദീപ് ഗോപാൽ പുരസ്‌കാരം ഏറ്റുവാങ്ങി

തൊടുപുഴ-
ഇടുക്കി പ്രസ് ക്ലബ്ബിന്റെ 2022ലെ കെ പി ഗോപിനാഥ് മാധ്യമ പുരസ്കാരം ദേശാഭിമാനി സീനിയർ സബ് എഡിറ്റർ പ്രദീപ് ഗോപാലിന് മന്ത്രി റോഷി അ​ഗസ്റ്റിൻ സമ്മാനിച്ചു. 10,001 രൂപയും പ്രശസ്തിപത്രവും അടങ്ങുന്നതാണ് പുരസ്കാരം. കെ പി ​ഗോപിനാഥ് അനുസ്മരണവും മാധ്യമപുരസ്കാര സമർപ്പണവും മന്ത്രി ഉദ്ഘാടനം ചെയ്തു. പ്രസ് ക്ലബ് പ്രസിഡന്റ് സോജൻ സ്വരാജ് അധ്യക്ഷനായി.

കായിക വിഭാഗത്തിൽപ്പെടുന്ന റിപ്പോർട്ടുകളും ഫീച്ചറുകളുമാണ് ഇക്കുറി പുരസ്കാരത്തിന് പരിഗണിച്ചത്. 2022 മെയ് 27 മുതൽ 31 വരെ പ്രസിദ്ധീകരിച്ച ‘മുഴങ്ങുന്നു മൈതാനം, തുടരട്ടെ ഈ കാലം' എന്ന പരമ്പരയാണ് പ്രദീപിനെ അവാർഡിന് അർഹനാക്കിയത്.

മലയാള മനോരമ മുൻ പ്രത്യേക ലേഖകൻ പി അജയകുമാർ കെ പി ​ഗോപിനാഥിനെ അനുസ്മരിച്ചു. പ്രസ് ക്ലബ് സെക്രട്ടറി ജെയ്സ് വാട്ടപ്പിളളിൽ, ട്രഷറർ വിൽസൺ കളരിക്കൽ എന്നിവർ സംസാരിച്ചു.